Fundur haldinn í Muggsstofu, Bíldudal, 11. september 2024 og hófst hann kl. 16:30
Nefndarmenn
- Jenný Lára Magnadóttir (JLM) aðalmaður
- Jón Þórðarson (JÞ) varamaður
- Rúnar Örn Gíslason (RÖG) formaður
- Valdimar Bernódus Ottósson (VBO) varaformaður
Starfsmenn
- Arnheiður Jónsdóttir (AJ) sviðsstjóri fjölskyldusviðs
- Elfar Steinn Karlsson (ESK) byggingarfulltrúi
- Lilja Magnúsdóttir (LM) ritari heimastjórna
- Valgerður María Þorsteinsdóttir (VMÞ) menningar- og ferðamálafulltrúi
Fundargerð ritaði
- Lilja Magnúsdóttir ritari
Almenn mál
1. Fjárhagsáætlun 2025 - 2028
Tillögur og áherslur heimastjórnar Arnarfjarðar fyrir fjárhagsáætlun 2025 - 2029
Rætt um áherslur heimastjórnar Arnarfjarðar vegna fjárhagsáætlunar 2025 - 2029. Tillaga heimastjórnar verður lögð fram á næsta fundi til samþykktar.
Málsnúmer 2406054 15
2. Krosseyri. Deiliskipulag fyrir Heilsusetur
Tekin fyrir tillaga að deiliskipulagi fyrir heilsusetur á Krosseyri. Tillagan var auglýst frá 25. mars til 6. maí 2024. Engar athugasemdir bárust á auglýsingatíma.
Fyrir liggja umsagnir frá Heilbrigðiseftirliti Vestfjarða, Minjastofnun, Umhverfisstofnun og Náttúrufræðistofnun. Fyrir liggur uppfærð tillaga þar sem komið hefur verið til móts við umsagnir en eftirfarandi breytingar gerðar á tillögunni.
Bætt var við umfjöllun um votlendi, samgöngur og fjölda gistirúma.
Skipulags- og framkvæmdaráð lagði til við heimastjórn Arnarfjarðar á 3. fundi sínum að tillagan verði samþykkt og að hún verði afgreidd skv. 42. gr. skipulagslaga nr. 123/2010.
Heimastjórn Arnarfjarðar samþykkir tillögu að deiliskipulagi á Krosseyri og að málsmeðferð verði samkvæmt 42. grein skipulagslaga nr. 123/2010.
Samþykkt samhljóða.
Málsnúmer 2205020 6
3. Suðurfjarðagöng, jarðgöng undir Mikladal og Hálfdán
Suðurfjarðagöng, undirbúningur jarðganga fyrir Mikladal og Hálfdán. Bókun heimastjórnar Patreksfjarðar frá 3. fundi 04.09.2024.
Heimastjórn Arnarfjarðar tekur heilshugar undir bókun heimastjórnar Patreksfjarðar á 3. fundi hennar 04.09.2024 og heimastjórnar Tálknafjarðar á 3. fundi hennar 05.09.2024, um mikilvægi þess að hraða rannsóknum og undirbúningi fyrir gerð Suðurfjarðaganga. Íbúar á Bíldudal búa við verulegar takmarkanir á samgöngum yfir vetrartímann þar sem yfir 530 metra háan fjallveg er að fara á Hálfdán og oft erfið færð þar en sækja þarf alla neyðarþjónustu læknis og annarra viðbragðsaðila svo sem sjúkrabíls og slökkviliðs yfir þann fjallveg. Í því sambandi má benda á að sjúkrabílar í Vesturbyggð eru staðsettir á Patreksfirði og við bestu aðstæður tekur lágmark 30 mín. að komast til Bíldudals.Auk þess ítrekar heimastjórn Arnarfjarðar nauðsyn þess að tryggja öruggt aðgengi að sjúkraflugi á Bíldudalsflugvelli sem er sjúkraflugvöllur svæðisins.
Samþykkt samhljóða.
Málsnúmer 2409012 4
4. Aðflugsljós á Bíldudal
Aðflugsljós á Bíldudal og nauðsyn þess að þau verði sett upp sem fyrst.
Heimastjórn Arnarfjarðar leggur mikla áherslu á að aðflugsljós við Bíldudalsflugvöll verði í forgangi við vinnu við samgönguáætlun vegna mikilvægis flugvallarins sem sjúkraflugvallar og sem samgönguleiðar inn á sunnanverða Vestfirði.
Heimastjórn Arnarfjarðar hvetur bæjarstjórn Vesturbyggðar til að leggja áherslu á að aðflugsljós við flugvöllinn á Bíldudal verði sett upp sem allra fyrst til að auka öryggi í aðflugi að flugvellinum og tryggja að hægt sé að lenda á flugvellinum allan sólarhringinn. Sjúkraflug á Bíldudal jafngildir sjúkrabíl til að koma sjúklingum sem fyrst undir læknishendur í Reykjavík.
Brýnt er að koma uppsetningu aðflugsljósa inn í fyrsta hluta samgönguáætlunar og í forgangsröðun í framkvæmdaáætlun Isavia sem ber ábyrgð á innanlandsflugi. Jafnframt verði að tryggja að stöðugar endurbætur á flugleiðsögn og tækninýjungar þar að lútandi skili sér í uppbyggingu og viðhaldi á aðstöðunni á Bíldudalsflugvelli til að tryggja öryggi sjúkraflugs og farþegaflugs.
Bíldudalsflugvöllur er skilgreindur sem flugvöllur í grunnneti samgangna og gegnir veigamiklu hlutverki í samgöngum á Vestfjörðum. Fjórðungsþing Vestfirðinga hefur ítrekað ályktað um nauðsyn þess að flugöryggi sé tryggt á Vestfjörðum með sérstakri áherslu á flugleiðsögn og gervihnattarflugleiðsögn á vestari hluta landsins og að þeirri uppbyggingu beri að flýta sem mest.
Málsnúmer 2409030
5. Umferðaröryggisáætlun fyrir Vesturbyggð
Umferðaröryggi á Bíldudal og umferðaröryggisáætlun fyrir Vesturbyggð
Heimastjórn Arnarfjarðar ítrekar nauðsyn þess að farið verði þegar í stað í markvissar aðgerðir varðandi umferðaröryggismál á Bíldudal samkvæmt fyrirliggjandi skýrslum. Nauðsynlegt er að taka niður umferðarhraða við innkomu inn í bæinn t. d. með hringtorgi og lagfæra hámarkshraða í samræmi við gildandi lög.
Samþykkt samhljóða.
Málsnúmer 2406025
6. Eldri borgarar Bíldudal
Erindi frá eldri borgurum á Bíldudal
Arnheiður Jónsdóttir sviðsstjóri fjölskyldusviðs og Valgerður María Þorsteinsdóttir forstöðumaður Muggsstofu komu inn á fundinn og fóru yfir stöðu á málefnum eldri borgara á Bíldudal.
Aðstaðan í Muggsstofu hefur orðið fyrir áhrifum af stöðu skólamála á Bíldudal og því hefur starfsaðstaðan skerst. Rætt var um að gerð yrði formleg könnun í haust á vilja eldri borgara til að sinna félagsstarfi þannig að ljóst væri hver áhugi íbúa væri.
Unnið er að uppsetningu á tjaldi og skjávarpa í Byltu en nauðsynlegt er að gera við þakið á húsinu til að tryggja að búnaður verði ekki fyrir skemmdum.
Bent var á verkefnið Gott að eldast sem er samstarfsverkefni sveitarfélagsins og Heilbrigðisstofnunar Vestfjarða. Hjá Heilbrigðisstofnuninni er unnið að uppsetningu á heimaendurhæfingu sem mun væntanlega taka til starfa á næstunni.
Einnig kom fram að Heilbrigðisstofnunin hefur tekið við heimaþjónustu af sveitarfélaginu og mun hún hefjast í október þegar starfsmaður tekur til starfa.
Þessar breytingar voru kynntar á fundum í júní og í byrjun september.
Málsnúmer 2409032
Mál til kynningar
7. Bíldudalsskóli - húsnæði
Málefni Bíldudalsskóla kynnt
Arnheiður Jónsdóttir sviðsstjóri fjölskyldusviðs og Magnús Árnason verkefnastjóri á umhverfis- og framkvæmdasviði komu inn á fundinn ásamt Elfari Stein Karlssyni byggingarfulltrúa og svöruðu spurningum heimastjórnar varðandi byggingu Bíldudalsskóla sem er í undirbúningi.
Einnig er unnið að undirbúningi lóðar til að hægt sé að hefja vinnu við byggingu grunns.
Heimastjórn Arnarfjarðar hvetur bæjarstjórn til að fara að huga strax að vinnu við áfanga 2 þannig að hönnun og skipulag sé tilbúið þegar þörf verður á þeirri viðbót.
Málsnúmer 2407024 3
8. Hafnarbraut, Bíldudal. Umsókn um lóð undir hótelbyggingu.
Hafnarbraut, Bíldudal. Lóð undir hótelbyggingu. Lagt fram til kynningar
Elfar Steinn Karlsson hafnarstjóri kom inn á fundinn og skýrði stöðu málsins.
Málsnúmer 2312029 2
9. Ofanflóðavarnir á Bíldudal
Ofanflóðavarnir á Bíldudal kynntar
Elfar Steinn Karlsson byggingarfulltrúi kom inn á fundinn og kynnti stöðu mála varðandi ofanflóðavarnir á Bíldudal.
Heimastjórn Arnarfjarðar leggur til að haldin verði kynning fyrir bæjarstjórn og heimastjórn með Ofanflóðasjóði og hönnuðum á haustdögum 2024 til að fara yfir stöðu mála.
Samþykkt samhljóða.
Málsnúmer 2010046 9
Fleira ekki gert. Fundi slitið kl. 19:47
Formaður setti fund og kannaði hvort athugasemdir væru við fundarboðið. Svo var ekki og formaður lýsti fundinn lögmætan.
Valdimar Ottósson boðaði seinkun á mætingu og Jón Þórðarson fyrsti varamaður sat fundinn í hans stað. Valdimar mætti á fundinn 18:30.