Fundur haldinn í Aðalstræti 63, Patreksfirði, 22. febrúar 2016 og hófst hann kl. 16:00
Fundargerð ritaði
- Elfar Steinn Karlsson forstm. tæknideildar
Almenn erindi
1. Deiliskipulag iðnaðarsvæðis við Bíldudal
Lögð fram til kynningar drög að deiliskipulagi fyrir iðnaðarsvæði neðan Hólsgils, Bíldudal.
Málsnúmer 1203018 6
2. Vatnslögn í landi Litlu-Eyrar Bíldudal.
Erindi frá Hannesi Bjarnasyni f.h. meirihlutaeigenda Litlu-Eyrar, Bíldudal. Í erindinu er sótt um leyfi til að leggja vatnslögn frá Strengfelli í Bíldudalnum niður í byggðina í Bíldudalnum meðfram Dalbrautinni að Arnarbakka. Lengd lagnar verður um 4 km og sverleiki plastlagnar 90-160 mm. Erindinu fylgir loftmynd uf fyrirhugaðri legu lagnarinnar unnin af Verkís. Vatnið er ætlað til notkunar fyrir jarðvarmadælur í byggðarlaginu Bíldudal skv. bréfritara.
Ekki kemur fram í umsókninni hvort fyrirhugað sé að leggja lögnina í jörðu eða á yfirborð.
Skipulags- og umhverfisráð óskar eftir frekari upplýsingum og felur byggingarfulltrúa að afla þeirra. Málinu frestað.
Málsnúmer 1602011 2
3. Umsókn um auglýsingaskilti
Erindi frá Þórbergi Egilssyni f.h. Lyfju hf. Í erindinu er óskað eftir að fá að setja niður auglýsingaskilti frá Lyfju til leiðbeiningar við staðsetningu verslunarinnar. Gerðar eru tvær tillögur að skiltum, báðar við Strandgötuna á Patreksfirði, annarsvegar við gatnamót Strandgötu/Aðalstrætis/Þórsgötu og hinsvegar neðan við Bröttuhlíð (Á strandgötu).
Skipulags- og umhverfisráð getur ekki samþykkt fyrrgreindar óskir um auglýsingaskilti sem bréfritari leggur til og bendir á svæði innan við Kirkjugarð fyrir það merki að höfðu samráði við Vegagerðina. Ráðið bendir á að skilti E01.31 (Lyfjaverslun) verði sett upp skv. reglugerð um umferðarmerki við gatnamót Strandgötu/Aðalstrætis/Þórsgötu.
Málsnúmer 1601047
4. Umsókn um byggingarleyfi fyrir gluggaskiptum.
Erindi frá Rebekku Hilmarsdóttur og Erni Hermanni Jónssyni. Í erindinu er sótt um byggingarleyfi fyrir breytingu á gluggum á framhlið hússins að Aðalstræti 69, Patreksfirði. Unnið er að því að koma húsinu í upprunalegt horf. Erindinu fylgja uppdrættir af gluggum sem og ljósmyndir frá 1910 er sýna fyrra útlit. Einnig er meðfylgjandi jákvæð umsögn Minjastofnunar vegna breytinganna.
Skipulags- og umhverfisráð samþykkir erindið og felur byggingarfulltrúa útgáfu byggingarleyfis.
Málsnúmer 1602001
5. Umsókn um endurnýjun á lóðaleigusamning.
Erindi frá Kristjáni Þórðarsyni, Breiðalæk f.h. Strandar ehf. Í erindinu er óskað eftir endurnýjuðum lóðaleigusamningi undir fasteign félagsins að Krossholtum(Saumastofan), landnr.139840. Þess er einnig óskað að úr samningi verði felldur hluti 5.gr, sá er kveður á um forkaupsréttarákvæði leigusala. Eldri samningur féll úr gildi 2005.
Skipulags- og umhverfisráð samþykkir endurnýjun lóðaleigusamnings en vísar óskum varðandi niðurfellingu á hluta 5.gr samnings til bæjarstjórnar.
Málsnúmer 1601052 2
6. Sýslumaðurinn nýtt rekstrarleyfi fyrir Ferðaþjónustuna Örlygshöfn, umsagnarbeiðni
Umsagnarbeiðni frá Sýslumanninum á Vestfjörðum. Óskað er umsagnar vegna umsóknar um nýtt rekstrarleyfi fyrir ferðaþjónustuna Örlygshöfn, eldra leyfi er útrunnið.
Skipulags- og umhverfisráð getur ekki tekið erindið til umsagnar m.v. innsend gögn.
Málsnúmer 1602043 2
7. Kattahald í Vesturbyggð.
Umræður um kattahald í Vesturbyggð og reglur þar að lútandi. Skipulags- og umhverfisráð mælist til þess að gerð verði samþykkt fyrir sveitarfélagið um kattahald.
Málsnúmer 1602046 4
8. Fyrirspurn - Tjarnarbraut 29A
Fyrirspurn frá Birni M. Magnússyni f.h. Mardallar ehf. Í erindinu er spurt um hvort heimilt væri að rífa fasteignina að Tjarnarbraut 29A, Bíldudal sem er 23,8 m2 geymsla og byggja í kringum 75m2 geymslu/bílskúr í þess stað. Einnig ef fyrirhuguð áform samræmist ekki skipulagsskilmálum hvort að lóðin fengist stækkuð. Lóðin að Tjarnarbraut 29A er 100 m2.
Fyrrgreind lóð er á svæði sem er skv. aðalskipulagi Vesturbyggðar 2006-2018 skilgreint sem íbúðasvæði, nýtingarhlutfall á þessum lóðum er 0,2-0,4. Skipulags- og umhverfisráð tekur jákvætt í erindið og fellst á fyrirhuguð áform.
Málsnúmer 1602047
Fleira ekki gert. Fundi slitið kl. 16:00
Óskar Örn Gunnarsson skipulagsfulltrúi, Árni Traustason byggingarfulltrúi og Guðmundur V. Magnússon eru viðstaddir í gegnum fjarfundarbúnað.