Samtal við forsvarsmenn Arctic Fish

Stein Ove framkvæmdastjóri Arctic Fish kom inná fundinn að beiðni bæjarráðs og fór yfir málefni sem snúa að Arctic Fish, og þau vandamál sem komið hafa upp í sjókvíaeldi fyrirtækisins síðustu mánuði.

Bæjarráð leggur áherslu á að allir verkferlar fiskeldisfyrirtækja séu vandaðir, þeir séu í samræmi við lög og reglugerðir og farið eftir þeim. Skaðinn sem slysasleppingin sem átti sér stað Patreksfirði hefur haft neikvæð áhrif á samfélagið á sunnanverðum Vestfjörðum og leggur bæjarráð áherslu á að íbúar verði upplýstir um hvað fyrirtækið ætlar að gera til að koma í veg fyrir að atburðir sem slíkir endurtaki sig.

Bæjaráð leggur áherslu á að Arctic Fish vinni með sjálfbærni í forgangi í sátt við umhverfið og samfélagið. Bæjarráð leggur áherslu á að Arctic Fish bæti samskipti sín og upplýsingagjöf til stjórnenda sveitarfélagsins og íbúa svæðisins.